Tuesday, July 12, 2011

ທີມງານວິທະຍຸໄວໜຸ່ມແຂວງໄຊຍະບູລີ

ໂດຍ​ເຫັນ​ໄດ້​ຄວາມສຳຄັນ​ຂອງ​ການ​ມີ​ສ່ວນ​ຮ່ວມ ​ໃນ​ການ​ດຳ​ເນີນ​ໂຄງການ​ວິທະຍຸ​ສຳລັບ​ເດັກ​ໄວ​ຫນຸ່ມ ​ເຊິ່ງ​ແມ່ນ​ການ​ຮຽນ​ຮູ້​ທີ່​ມີ​ຄຸນຄ່າ  ອັນ​ຈະ​ກ້າວ​ໄປ​ເຖິງ ​ການ​ເຮັດ​ໃຫ້​ໄວ​ຫນຸ່ມ​ໄດ້​ຮັບ​ປະສົບ​ການ​ຄວາມ​ຮູ້ ​ແລະ​ທັກ​ສະ ທີ່​ເຂົາ​ເຈົ້າ​ ຈະ​ສາມາດ​ນຳ​ໄປ​ໃຊ້​ໃນ​ຊີວິດ​ປະຈຳ​ວັນ​ໄດ້ ​ແລະ​ເຮັດ​ໃຫ້​ໂຄງການ ວິທະຍຸ​ເດັກ​ແລະ​ໄວ​ຫນຸ່ມ ​ໄດ້​ເປັນ​ທີ່​ຮັບ​ຮູ້​ ຈາກ​ສັງຄົມ​ຢ່າງ​ກ້ວງ​ຂວາງ ໂຄງການ​ວິທະຍຸ​

ເດັກ ​ແລະ​ໄວ​ຫນຸ່ມ​​ ແຂວງ​ໄຊ​ຍະ​ບູລີ ແມ່ນ​ຫນຶ່ງ​ໃນ 12 ​ແຂວງ ທີ່​ໄດ້​ຮັບ​ການ​ສະຫນັບສະຫນູນ​ດ້ານ​ທຶນຮອນ ຈາກ​ອົງການ​ຢູນິ​ເຊັບ ​ໃນ​ການ​ດຳ​ເນີນ​ລາຍການ ​ແມ່ນ​ໄດ້​ເລີ່​ມປະຕິບັດ​ມາ ​ແຕ່​ທ້າຍ​ປີ 2007 ມີ​ທີ​ມງານ​ຜູ້​ຮັບຜິດ​ຊອບ​ໂຄງການ​ປະກອບ​ມີ: ວິທະຍຸ​ກະຈາຍສຽງ​ ແຂວງ​ໄຊ​ຍະ​ບູລີ, ສູນວັດທະນະ​ທະ​ແຂວງ.
​ໂຄງການ​ນີ້ ​ໄດ້​ເປັນ​ແຮງ​ດັນ ສ້າງ​ຄວາມ​ສາມາດ ​ໃຫ້​ແກ່​ເດັກ​ແລະ​ໄວ​ຫນຸ່ມ​ໃນ​ການ​ໂຄສະນາ​ສິດທິ​ຂອງ​ຕົນ​ເອງ ຜ່ານ​ກິດຈະກຳ​ສະ​ແດງ​ກັບ​ຊຸມ​ຊົນ ​ແລະ​ຜ່ານ​ຄື້ນວິທະຍຸ​ກະຈາຍສຽງ, ອັນ​ສຳຄັນ​ ພວກ​ເຮົາ​ມີ​ຄວາມ​ພູມ​ໃຈ ທີ່​ຜູ້​ໃຫຍ່​ມີ​ຄວາມ​ເຂົ້າ​ໃຈ ​ແລະ​ຍອມຮັບ​ຄວາມ​ຄິດ​ເຫັນ​ຂອງ​ເດັກນ້ອຍ ນັບ​ມື້​ນັບ​ຫລາຍ​ຂຶ້ນ ລວມ​ໄປ​ເຖິງ ອຳນາດ​ການ​ປົກຄອງ​ຂັ້ນ​ສູງ ກໍ​ຮັບ​ຮູ້ ​ແລະ​ຊຸກ​ຍູ້​ໃຫ້​ເດັກນ້ອຍ ​ໄດ້​ສະ​ແດງ​ຄວາມ​ສາມາດ​ຂອງ​ເຂົາ​ເຈົ້າ​ອອກ ​ໂດຍ​ການ​ໂຄສະ​ນາສິດ​ທິ​ເດັກ ​ແລະ​ບັນຫາ​ອື່ນໆ ທີ່​ມີ​ຜົນ​ດີ​ຕໍ່​ໄວ​ຫນຸ່ມ ​ໂດຍ​ສະ​ເພາະ​ບັນຫາ​ຢາ​ເສບ​ຕິດ, ​ໂລກ​ເອດ, ການ​ຄ້າ​ມະນຸດ, ສຸຂະພາບ, ນ້ຳ​ສະອາດ, ສິ່ງ​ແວດ​ລ້ອມ ​ແລະ​ບັນຫາ​ອື່ນໆ.
ພາຍຫລັງ​ທີ​ມງານ​ໄດ້​ຮັບ​ການ​ສ້າງ​ຕັ້ງ​ຂຶ້ນ ​ໃນ​ທ້າຍ​ປີ 2007  ທາງ​ທີ​ມງານ​  ຜູ້​ຮັບຜິດຊອບ​ໂຄງການ ກໍ​ໄດ້​ພະຍາຍາມ​ຊອກ​ຫາ ​ແລະ​ເລືອກ​ເຟັ້ນ​ເອົນ​ນັກ​ຈັດ​ລາຍການ ວິທະຍຸ​ທີ່​ຫນຸ່ມ​ນ້ອຍ ທີ່​ບໍ່​ສັງກັດ​ຢູ່​ໃນ​ອົງ​ກອນ​ໃດ​ມາ​ກ່ອນ​ ມາ​ຈັດ​ລາຍການ​ວິທະຍຸ​ໃນ​ໄລຍະ​ທຳ​ອິດ ​​ເຊິ່ງໄດ້​ທົດ​ລອງ​ການ​ດຳ​ເນີນ​ລາຍການ ​ເປັນ​ລາຍການ​ອັດ ທີ່​ມີ​ຊື່​ລາຍການ​ວ່າ: ​ໂລກ​ສົດ​ໃສ​ດ້ວຍ​ໃຈ​ເຮົາໃນ​ຫົວ​ຂໍ້: ພໍ່​ຮັກ​ລູກ ຜູກ​ພັນ​ຄອບຄົວ ກະຈາຍ​ອອກ​ອາກາດ​ໃນ​ວັນ​ທີ 24 ຕຸລາ 2007​ ທີ່​​ສະຖານີ ວິທະຍຸ​ກະຈາຍສຽງ​ແຂວງ​ໄຊ​ຍະ​ບູລີ ​ເຊິ່ງຫົວ​ຂ້ນີ້ ​ແມ່ນ​ມີ​ເນື້ອ​ໃນ​ເວົ້າ​ເຖິງ​ການ​ມອບຄວາມ​ອົບ​ອຸ່ນ​ໃຫ້​ແກ່​ຄອບຄົວ ຈາກ​ພໍ່ ​ຫາ​ແມ່ ​ແລະ​ພໍ່​ຫາລູກ ຈາກ​ນັ້ນ​ມາ​ກໍ​ໄດ້​ປ່ຽນ​ຊື່​ລາຍການ​ມາ​ເປັນ:​ດວງ​ໃຈສີຂາວ, ​ເຊິ່ງອອກ​ອາກາດ​ໃນ​ວັນ​ທີ4 ພຶດສະພາ 2008 ​ເວລາ 17:00-17: 30 ​ໃນ​ຫົວ​ຂໍ້: ​ໄວ​ຫນຸ່ມ​ມີ​ຄວາມ​ສ່ຽງ​ສູງ ຕໍ່ການ​ຕິດ​ເຊື້ອ​ເອດແລະພໍ​ມາ​ເຖິງ ວັນ​ທີ 06 ພະຈິກ 2008 ລາຍການ​ຂອງ​ພວກ​ເຮົາ​ກໍ​ໄດ້​ປ່ຽນ​ຊື່​ອີກ​ຄັ້ງ ​ໂດຍ​ໃສ່​ຊື່ວ່າ:” ລາຍການ​ເປີດ​​ໃຈ​ໄວ​ຫນຸ່ມອອກ​ອາກາດ​ທາງ​ຄື້ນ FM 95,3 MHz ທີ່​ວິທະຍຸ​ກະຈາຍສຽງ​ແຂວງ​ໄຊ​ຍະ​ບູລີ ວັນ​ພະຫັດ ​ເວລາ17: 00-17: 30 ​ໃນ​ຫົວ​ຂໍ້: ມີ​ຮັກ​ໃນ​ໄວ​ຮຽນ ​ເຫນືອ​ນ​ແສງ​ທຽນ​ໃກ້​ຈະ​ມອດ ​ເຊິ່ງມີ​ເນື້ອ​ໃນ​ເວົ້າ​ເຖິງ ຜົນ​ສະທ້ອນ​ຂອງ​ການ​ມີ​ຄວາມ​ຮັກ ​ໃນ​ໄວ​ຮຽນ​ຂອງ​ໄວ​ຫນຸ່ມ
ສະຫລຸບ​ລວມ​​ແລ້ວ ລາຍການ​ວິທະຍຸ ​ເພື່ອ​ໄວ​ຫນຸ່ມ ​ໂດ​ຍ​ໄວ​ຫນຸ່ມ​  ນຳ​ສະ​ເຫ​ນີ   ​ໄດ້ເກີດ​ຂຶ້ນ​ເປັນ​ເອກະ​ພາບ​ກັນ ກັບ​ບັນດາ​ແຂວງ​ຕ່າງໆ ​ໂດຍໄດ້​ພ້ອມ​ກັນ​ກຳນົດ​ຊື່​ລາຍການ, ​ແລະ​ຊື່​ນັ້ນ​ທຸກ​ແຂວງ ​ຕ້ອງສະ​ເຫ​ນີພາບ ​ໃສ່​ຊື່​ຄື​ກັນ​ຫມົດຄື: ​“ເປີດ​ໃຈ​ໄວ​ຫນຸ່ມສຳລັບ​ແຂວງ​ໄຊ​ຍະ​ບູລີ​ຂອງ​ພວກ​ເຮົາ​ນິ້ ​ໄດ້ທຳ​ການ​ກະຈາຍ​ອອກ​ອາກາດ​ໃນ​ລະບົບFM 95,3 MHz ທຸກ ວັນ​ພະຫັດ ​ເວລາ 17: 00 – 17: 30 ນາທີ ​ແລະ​ອອກ​ອາກາດ​ຊ້ຳ ​ໃນ​ວັນ​ເສົາ ​ເວລາ 11: 00 – 11: 30 ນາທີ. 
ທີມງານວິທະຍຸໄວໜຸ່ມແຂວງໄຊຍະບູລີປະກອບມີ:
ຊື່ ແລະ ນາມສະກຸນ ນ ພູວົງ ຈັນທະມາລີ , ທີ່ເກີດບ້ານສີມົງຄຸນ, ທີ່ຢູ່ປັດຈຸບັນ ບ້ານສີມົງຄຸນ, ປະຈຸບັນຮຽນຫນັງສືຢູ່​​ໂຮງຮຽນ ມັດທະຍົມສຶກສາສົມບູນໄຊຍະບູລ, ເວລາຫວ່າງ: ຟັງເພັງ, ຟັງຂ່າວ ແລະ ຫລິ້ນກິລາ
 ນ້ອງເອງເປັນນັກຈັດລາຍການມາແຕ່ປີ 2007 ການດຳເນີນກິດຈະກຳແມ່ນໄດ້ແບ່ງອອກເປັນ2​ກຸ່ມແລະແບ່ງວຽກໃຫ້ກັບແຕ່ລະກຸ່ມເຮັດໃນແຕ່ລະອາທິດ,​ເນື້ອໃນລາຍການແມ່ນພວກເຮົາຈະເອົາຕາມປຶ້ມແລະກໍແຕ່ງເອົາ. ຄວາມປະທັບໃຈຂອງນ້ອງກໍແມ່ນການໄດ້ໄປສຳພາດ , ​ແລະເວລາອັດລາຍການເພາະທີມງານແມ່ນມີຄວາມເປັນກັນເອງ, ອົບອຸ່ນແລະຊ່ວຍເຫລືອເຊິ່ງກັນແລະກັນ.... 
ຊື່ ແລະ ນາມສະກຸນ ນ ນັນທິດາ ຈັນທະວົງ, ທີ່ເກີດ ບ້ານສີມົງຄຸນ, ທີ່ຢູ່ປັດຈຸບັນບ້ານສີມົງຄຸນ,ປະຈຸບັນຮຽນຫນັງສືຢູ່​​ໂຮງຮຽນມັດທະຍົມສຶກສາສົມບູນໄຊຍະບູລີ. ເວລາຫວ່າງ: ຟັງເພັງ ແລະ ອ່ານຫນັງສື.
ເລີ່ມຕົ້ນການຈັດລາຍການແຕ່ປີ 2007 ການດຳເນີນ ກິດຈະກຳແຕ່ລະໄລຍະແມ່ນດຳເນີນດ້ວຍດີພວກ ນ້ອງໄດ້ແບ່ງເປັນສອງກຸ່ມ ແຕ່ລະອາທິດ ພວກນ້ອງກໍໄດ້ແບ່ງກັນໄປ ເພາະມີຄວາມປະທັບໃຈຫລາຍຢ່າງເຊັ່ນ: ​ໄດ້ບົດຮຽນ, ​ໄດ້ຄວາມຮູ້, ​ໄດ້ປະສົບການຕ່າງໆໄດ້ເປັນນັກ ຈັດລາຍການ ວິທະຍຸ ສຳລັບເດັກ ແລະ ໄວໜຸ່ມທີ່ດີໄດ້ເຮັດວຽກໃນສິ່ງທີ່ບໍ່ເຄີຍໄດ້ເຮັດ ມາກ່ອນ, ອຸປະສັກຄຶການປະສານ ງານກັນຍາກ ເພາະແຕ່ລະຄົນບໍ່ໄດ້ ຢູ່ໂຮງ ຮຽນດຽວກັນ ບາງຄົນວັນເສົາ-ວັນອາທິດກໍ່ຮຽນເພີ່ມ, ການດຳເນີດໂຄງການ ວິທະຍຸເດັກໃນອານາຄົດ ຢາກຈະໃນ ຂະຫຍາຍອອກຕື່ມເພື່ອໃຫ້ຄົນໄດ້ ຮັບຮູ້ຫລາຍຂື້ນ ອີກຢ່າງ ໜຶ່ງຢາກໃຫ້ ໂຄງການນີ້ມີຕະຫຼອດຜ່ານມາຕົນເອງກໍໄດ້ເຝິກອົບຮົມຢູ່ແຂວງໄຊຍະກ່ອນໝູ່ ຕໍ່ມາກໍໄດ້ເຝິດອົບຮົມຢູ່ທີ່ແຂວງວຽງຈັນ (ວັງວຽງ) ແລະ ຢູ່ທີ່ແຂວງອຸດົມໄຊ (ເມືອງໄຊ) ການເຝິກອົບຮົມກໍໄດ້ຫຼາຍສິ່ງຫຼາຍຢ່າງ ເປັນຕົ້ນແມ່ນຄວາມຮູ້ຄວາມເຂົ້າໃຈໃນການເວົ້າການຈາ, ມີຄວາມສາມາດກ້າສະແດງອອກ. 
 ຊື່ ແລະ ນາມສະກຸນ ນ ວິໄຊຢາ ຈັນທິດາ. ທີ່ເກີດ ບ້ານສີມຸງຄຸນ, ທີ່ຢູ່ປັດຈຸບັນບ້ານ: ສີເມືອງ, ປະຈຸບັນຮຽນຫນັງສືຢູ່​​ໂຮງຮຽນມັດທະຍົມສຶກສາສົມບູນໄຊຍະບູລີ, ເວລາຫວ່າງ: ຂຽນບົດ ແລະ ຟ້ອນ. 
ເປັນນັກຈັດລາຍການມາແຕ່ປີ 2007 ສຳລັບນ້ອງແມ່ນມີຄວາມຮູ້ສຶກດີໃຈຫລາຍ ທີ່ໄດ້ມີສ່ວນຮ່ວມໃນໂຄງການນີ້ເຊິ່ງມັນເຮັດໃຫ້  ​ນ້ອງໄດ້ຮຽນຮູ້​​ເລື່ອງດີໆແລະສິ່ງໃຫມ່ ເປັນຕົ້ນກໍແມ່ນ ການອັດລາຍການວິທະຍຸ ສຳລັບເດັກແລະໄວຫນຸ່ມ ມັນເຮັດໃຫ້ນ້ອງ ຮູ້ຈັກການຂຽນຂ່າວ, ການເປັນນັກຈັດລາຍການທີ່ດີ, ​ແລະການຕັດຕໍ່ສຽງຕ່າງໆ, ການຂຽນບົດລະຄອນວິທະຍຸ ທັງຫມົດມັນເຮັດໃຫ້ນ້ອງໄດ້ມີການພັດທະນາຕົນເອງແລະໃນອານາຄົດ ຢາກໃຫ້ເພີ່ມຊ່ອງການອອກອາກາດເພື່ອໃຫ້ຜູ້ຟັງໄດ້ຮູ້ທົ່ວເຖິງກັນສ່ວນການຝຶກອົບຮົມນັ້ນ ທີ່ຜ່ານມານ້ອງໄດ້ເຂົ້າອົບຮົມເລື່ອງ ພໍ່ຮັກລູກ ຜູກພັນຄອບຄົວ ທີ່ແຂວງ​​ໄຊຍະບູລີ, ຝຶກອົບຮົມທັກສະຊີວິດ ຊຶ່ງຈັດຂຶ້ນທີ່ແຂວງອຸດົມໄຊ, ​ໄດ້ລົງບໍລິການຊຸມຊົນແລະອື່ນໆ ທີ່ໄດ້ຮັບຈາກໂຄງການ ວິທະຍຸເດັກແລະໄວຫນຸ່ມ. 
ຊື່ ແລະ ນາມສະກຸນ  . ສາລີ ພົມສີ , ທີ່ເກີດບ້ານ ດອນເງິນ, ທີ່ຢູ່ປັດ ຈຸບັນບ້ານ: ດອນເງິນ,ມັດທະຍົມສຶກສາສົມບູນໄຊຍະບູລີ.ເວລາຫວ່າງ: ອ່ານຫນັງສື
 ເລີ່ມຕົ້ນການຈັດລາຍການແຕ່ປີ 2007 ການດຳເນີນກິດຈະກຳແຕ່ລະໄລຍະແມ່ນ ພວກເຮົາແບ່ງເປັນສອງກຸ່ມ ແລະ ຈະແບ່ງວຽກໃຫ້ແຕ່ລະກຸ່ມໄປໃນແຕ່ລະອາທິດ ເອົາຫົວຂໍຕ່າງໆທີ່ຢູ່ ໃນປື້ມ ປະທັບໃນຫຼາຍທີ່ໄດ້ເປັນນັກຈັດ ລາຍການວິທະຍຸສຳລັບເດັກ ແລະ ໄວໜຸ່ມ....ອຸປະສັກໃນການເຮັດວຽກແມ່ນການເດີນທາງການ ໄປການມາແມ່ນມີ ຄວາມລຳບາກເພາະສະຖານີວິທະຍຸແມ່ນຢູ່ໄກຫຼາຍ ການດຳເນີນໂຄງການໃນອານາຄົດ ຢາກໃຫ້ມີການເພີ່ມຊ່ອງ ສັນຍານ ນ້ອງເອງໄດ້ຝຶກອົບຮົມ ຢູ່ທີ່ແຂວງຕົນເອງແລ້ວ ຍັງໄດ້ໄປຝຶກຢູ່ທີ່ແຂວງວຽງຈັນ(ທ່າລາດ) ນອກນັ້ນຍັງໄດ້ ມີການແລກ ປ່ຽນບົດຮຽນນຳກັນກັນໝູ່ທີ່ເຂົ້າຮ່ວມໂຄງການ ແລະໄດ້ມີການປັບປຸງລາຍການໃຫ້ດີຂື້ນກວ່າເກົ່າ.  
ຊື່ ແລະ ນາມສະກຸນ  . ບົວສະຫວັນ ລິນທະວົງ ທີ່ເກີດ ບ້ານທ່ານາ, ທີ່ຢູ່ປັດຈຸບັນ: ບ້ານທ່ານາ.ປະຈຸບັນຮຽນຫນັງສືຢູ່​​ໂຮງຮຽນມັດທະຍົມ ສຶກສາສົມບູນໄຊຍະບູລີ. ເວລາຫວ່າງ: ອ່ານປຶ້ມ ແລະ ຟັງເພັງ.
ເປັນນັກຈັດລາຍການແຕ່ປີ2007 ​ເປັນຕົ້ນມາ ​​ແລະກໍເປັນຄັ້ງທຳອິດຂອງນ້ອງແລະເພື່ອນໆເຊິ່ງມີຄວາມປະທັບໃຈຫລາຍໃນການເຜີຍແຜ່ຄວາມຮູ້ໃຫ້ກັບຜູ້ຟັງໂດຍສະເພາະແມ່ນປະຊາຊົນແລະໄວຫນຸ່ມ ພວກເຂົາເຈົ້າຈະໄດ້ຮັບຟັງສຽງເພັງແລະນິທານ ສາລະຕ່າງໆ ຄຽງຄູ່ກັບການຈັດລາຍການ ນ້ອງກໍຍັງໄດ້ເຂົ້າອົບຮົມຢູ່ທີ່ແຂງຂອງຕົນແລະມີໂອກາດເຂົ້າອົບຮົມຢູ່ທີ່ພະແນກຖະແຫລ່ງຂ່າວ​-ວັດທະນະທຳສອງຄັ້ງ ຢູ່ຫລວງພະບາງບົດບາດ ຍິງ ຊາຍໜຶ່ງຄັ້ງ ໄປທັດສະນະສືກສາຢູ່ປະເທດ ກຳປູເຈຍໜຶ່ງຄັ້ງ ສິ່ງທີ່ປະທັບໃຈຄຶການເຮັດວຽກມີຜູ້ນຳທີ່ດີ, ໄດ້ປະ ສົບການຕ່າງໆ, ມີການເກັບກ່ຽວຂໍ້ມູນນອກສະຖານທີ. ການດຳເນີດລາຍການໃນອານາຄົດແມ່ນຢາກໃຫ້ມີເທັບອັດ ສຽງ(ນ້ອຍ)ຜູ້ລະໜ່ວຍຫຼຶກຸ່ມໜຶ່ງ3ໜວ່ຍ ເພາະຈະສະດວກໃນການເກັບກຳຂໍ້ມູນ... 

ຊື່ ແລະ ນາມສະກຸນ  . ເກວະລິນ ມິ່ງບຸບຜາ . ທີ່ເກີດ ບ ໂພສີ ແຂວງຫລວງພະບາງ, ທີ່ຢູ່ປັດຈຸບັນ: ບ້ານບຸ່ງ ເມືອງໄຊຍະ ແຂວງໄຊຍະບູລີ. ປະຈຸບັນຮຽນຫນັງສືຢູ່​​ໂຮງຮຽນ ມັດທະຍົມ ສຶກສາສົມບູນໄຊຍະບູລີ. ເວລາຫວ່າງ: ຟັງວິທະຍຸ. ເລີມເປັນນັກຈັດລາຍການມາແຕ່ປີ2008ການດຳເນີດກິດຈະ ກຳແຕ່ລະໄລຍະຜ່ານມາແມ່ນມີຄວາມເບີກບານມ່ວນຊື່ນ ໃນການ ເຮັດວຽກແລະກໍ່ມີອຸປະສັກພຽງເລັກນ້ອຍໃນການເຮັດວຽກ, ນ້ອງມີ ຄວາມປະທັບໃຈຫຼາຍໃນການ  ເປັນນັກຈັດລາຍການ ເພາະມັນໃຫ້ທັງຄວາມຮູ້ຄວາມສາມາດແກ່ນ້ອງແລະນ້ອງເອງກໍ່ມີການພັດທະນາຂື້ນໄປໃນທາງ
ທີ່ດີຫຼາຍຮູ້ຈັກໃຊ້ເວລາຫວ່າງ ໃຫ້ເປັນປະໂຫຍດ   ຮູ້ໃນເລື່ອງສີ່ງທີ່ບໍ່ເຄີຍຮູ້ໄດ້ປະສົບການໃໝ່ໆ ນ້ອງເອງ ໄດ້ຄວາມຮູ້ຈາກໂຄງການ ນີ້ຫຼາຍບໍ່ວ່າຈະເປັນເລື່ອງການຂຽນຂ່າວ,ການສຳພາດ ນ້ອງເອງມີຄວມຮູ້ສືກດີໃຈ ຫຼາຍ   ທີ່ໄດ້ເຂົ້າ ຮ່ວມໂຄງການນີ້ແລະຢາກໃຫ້ໂຄງການນີ້ຢູກັບ ເດັກນ້ອຍລາວໄປດົນໆເພື່ອຈະໄດ້ໃຫ້ນ້ອງໆລຸນຫລັງໄດ້ ມີໂອກາດມາເຮັດແບບນີ້.
ຊື່ ແລະ ນາມສະກຸນ ນ. ມິຖຸນາ ແສນຄຳ. ທີ່ເກີດບ້ານປົ່ງທີ່ຢູ່ປັດຈຸບັນ: ບ້ານປົ່ງ. ປະຈຸບັນຮຽນຫນັງສືຢູ່​ໂຮງຮຽນມັດທະຍົມສຶກສາສົມບູນໄຊຍະ​ບູລີ.ເວລາຫວ່າງ: ຟັງວິທະຍຸ.
 ນ້ອງເອງເປັນນັກຈັດລາຍການເລີ່ແຕ່ປີ 2007 ການດຳເນີນກິດຈະກຳນີ້ໃນໄລຍະທີຫນຶ່ງ ພວກເຮົາໄດ້ຈັດລາຍການແບບເປັນກຸ່ມ, ຮ່ວມກັນໃນການອັດລາຍການແລະໃນເວລານີ້ ພວກເຮົາກໍໄດ້ພົບກັບບັນຫາຫຍຸ້ງຍາກເລັກນ້ອຍເຊັ່ນວ່າ: ການຈັດແບ່ງວຽກງານ ຢາກມີການຂັດຂ້ອງເພາະພວກເຮົາຍັງບໍ່ທັນຮູ້ ການອບຫນ້າທີ່ຢ່າງຄັກແນ່ແລະພວກເຮົາກໍໄດ້ມີການປັບປຸງ ມາແຕ່ລະໄລຍະ ຈົນມາຮອດປະຈຸບັນກໍໄດ້ ມີຄວາມສະດວກຫລາຍຂຶ້ນກວ່າເກົ່ານ້ອງເອງ ມີຄວາມປະທັບໃຈຫລາຍ ທີ່ໄດ້ເຂົ້າຮ່ວມວິທະຍຸສຳລັບເດັກ-​ໄວຫນຸ່ມເພື່ອຈະນຳເອົາຄວາມຮູ້ຕ່າງໆ ບໍ່ວ່າຈະກ່ຽວກັບພະຍາດ, ການຮັກສາອານາໄມ, ການສຶກສາແລະບັນຫາອື່ນໆອີກ ທີ່ບອກເຕືອນໄວຫນຸ່ມແລະເດັກນ້ອຍ ນອກຈາກນັ້ນ ສ່ວນອຸປະສັກ ກໍແມ່ນການໄປສຳພາດ ຫລືການໄປເອົາຂ່າວຍາກ ພ້ອມທັງການໄປມາກໍບໍ່ຄ່ອຍສະດວກ. 
ຊື່ ແລະ ນາມສະກຸນ ທ. ວິໄລສັກ ສີສະຫວັດ. ທີ່ເກີດບ້ານແກ້ງ, ທີ່ຢູ່ປັດຈຸບັນ: ບ້ານແກ້ງ. ປະຈຸບັນຮຽນຫນັງສືຢູ່​​ໂຮງຮຽນມັດທະຍົມສຶກສາສົມບູນໄຊຍະບູລີ. ເວລາຫວ່າງ: ອ່ານປຶ້ມ ແລະ ຫລິ້ນກິລາບານເຕາະ.
ນ້ອງເອງເປັນນັກຈັດລາຍການເລີ່ຕົ້ນປີ 2008 ຈົນມາຮອດປະຈຸບັນນີ້ ການດຳເນີນກິດຈະກຳ ນີຖຶວ່າຄົນ ມີຄວາມສາມາດ ຫລາຍຂຶ້ນ.  ສິ່ງທີ່ປະທັບໃຈໃນການຈັດລາຍການວິທະຍຸກໍຄື: ແມ່ນການນຳຂ່າວສານ ສາລະນາຮູ້ຕຕ່າງໆ ມາເລົ່າສູ່ຜູ້ຟັງ ໄດ້ຮັບຟັງ ການປະສານງານນັ້ນ ບໍ່ຄ່ອຍສະດວກສະບາຍປານໃດແລະ​​ ເວລາທີ່ໄປຈັດລາຍການນັ້ນ ບາງຄົນກໍບໍ່ຄ່ອຍມີລົດ, ບາງຄົນກໍໄປຊ້າ ບໍ່ຕົງກັບນັດຫນາຍເພາະເຮືອນຂ້ອນຂ້າງທີ່ຈະຢູ່ໄກຈາກວິທະຍຸ....ສ່ວນການຝຶກອົບຮົມນັ້ນ ທີ່ຜ່ານມາແມ່ນໄດ້ເຂົ້າອົບຮົມ ຢູ່ທີ່ແຂວງ ວຽງຈັນ(ທ່າລາດ), ແຂວງນະຄອນຫຼວງ ວຽງຈັນ(ດອນຈັນພາເລດ) ຜ່ານການຝຶກອົບຮົບໄດ້ທັງຄວາມຮູ້ ແລະ ຮູ້ກ່ຽວກັບພະຍາດໄຂວັດໃຫຍ່2009 H1N1 ໃນການປ້ອງກັນຕົນເອງແລະຄົນອຶ່ນແຕ່ລະຄັ້ງນ້ອງເອງກໍແມ່ນ​​ໄດ້ຫມູ່ໃຫມ່, ​ໄດ້ຄວາມຮູ້ຫລາຍຢ່າງແລະຍັງໄດ້ໄປທັດສະນະສຶກສາອີກດ້ວຍ. 
ຊື່ ແລະ ນາມສະກຸນ ທ. ສຸລິຍັນ ຄຳໄບ.   ທີ່ເກີດບ້ານ​ ​ແກ້ງ, ທີ່ຢູ່ປັດຈຸບັນ: ບ້ານແກ້ງ. ປະຈຸບັນຮຽນຫນັງສືຢູ່​​ໂຮງຮຽນ ມັດທະຍົມສຶກສາສົມບູນໄຊຍະບູລີ.ເວລາຫວ່າງ: ແຕ້ມຮູບ, ຟັງວິທະຍຸ ແລະອ່ານປຶ້ມ. 
ເລີ່ມຈັດລາຍການມາຕັ້ງແຕ່ປີ 2008 ​ເຊິ່ງການດຳເນີນລາຍການແຕ່ລະໄລຍະແມ່ນມີຄວາມເບີກບານມ່ວນຊື່ນ, ມີຄວາມສາມັກຄີແລະຄວາມປະທັບໃຈນີ້ແມ່ນການນຳເອົາສາລະຫນ້າຮູ້ແລະຂ່າວສານມາເຜີຍແຜ່ໃຫ້ພໍ່ແມ່ປະຊາຊົນຮັບຮູ້ ສ່ວນອຸປະສັກກໍແມ່ນການຊອກຂ່າວແລະສຽງສຳພາດມວນຊົນເພາະວ່າພໍ່ແມ່ປະຊາຊົນ ຍັງບໍ່ທັນໃຫ້ການຮ່ວມມືດີປານໃດ ສ່ວນການດຳເນີນໂຄງການວິທະຍຸໃນອານາຄົດແມ່ນຢາກໃຫ້ມີຫ້ອງອັດລາຍການວິທະຍຸສຳລັບເດັກເປັນຂອງຕົນເອງເພື່ອຄວາມສະດວກສະບາຍໃນການໄປຈັດລາຍການປະຈຸບັນ ​​ແລະໃຫ້ພໍ່ແມ່ປະຊາຊົນສົ່ງຄຳຕິຊົມມາລາຍການຂອງພວກເຮົາ.
ການເຂົ້າຮ່ວມອົບຮົມແມ່ນໄດ້ເຂົ້າຮ່ວມກ່ຽວກັບການຂຽນບົດ, ຂຽນຂ່າວ ຢູ່ສູນວັດທະນະທຳເດັກໄຊຍະບູລີແລະຫົວຂໍ້ບົດບາດຍິງຊາຍ ຢູ່ແຂວງຫລວງພະບາງ ແລະມາເຖິງຕອນທ້າຍກໍຂໍເປີດໃຈຕົນເອງຕໍ່ໂຄງການນີ້ວ່າ: ນ້ອງເອງມີຄວາມພູມໃຈຫລາຍທີ່ໄດ້ປະກອບສ່ວນໂຄງການນີ້ໄດ້ຊ່ວຍສົ່ງເສີມໃຫ້ເດັກນ້ອຍ ມີຄວາມກ້າວຫນ້າເພາະເດັກນ້ອຍກໍຄືສົມບັດຂອງຊາດ ສະນັ້ນເຮົາຕ້ອງຝຶກໄວ້ແຕ່ວັນນີ້ເພາະເດັກນ້ອຍໃນວັນນີ້ ຄືຜູ້ໃຫຍ່ໃນວັນຫນ້າ.
ຊື່ ແລະ ນາມສະກຸນ ນ. ມະໄລເພັນ ສິດທິໄຊ . ທີ່ເກີດ: ບ ສີມຸງຄຸນ. ທີ່ຢູ່ປັດຈຸບັນ: ບ້ານສີມຸງຄຸນ,ປະຈຸບັນຮຽນຫນັງສືຢູ່​​ໂຮງຮຽນມັດທະຍົມສຶກສາສົມບູນໄຊຍະບູລີ.ເວລາຫວ່າງ: ຫຼີ້ນກິລາ, ຟ້ອນ.
ເລີ່ມເປັນນັກຈັດລາຍການແຕ່ປີ 2007 ການດໍາເນີນລາຍການ ແຕ່ລະໄລຍະ ແມ່ນມີຄວາມປະທັບໃຈຫຼາຍ ສິ່ງທີ່ປພທັບໃຈເປັນ ພິເສດກໍ່ຄືການເຮັດກິດຈະກຳແບບເປັນກັນເອງ, ແຕ່ວ່າກໍ່ຍັງມີອຸປະ ສັກເລັກນ້ອຍເຊັ່ນ: ການປະສານງານທາງດ້ານການປາກເວົ້າ, ການເດີນທາງ ມີຄວາມລຳບາກໂດຍສະເພາະແມ່ນ ຍາມຝົນ. ນ້ອງເອງມີຄວາມຮູ້ສືກດີໃຈຫຼາຍ ທີ່ໄດ້ຮ່ວມໂຄງການນີ້ ເພາະມັນ ເຮັດໃຫ້ນ້ອງມີຄວາມສາມາດກ້າສະແດງ ອອກກ້າເວົ້າກ້າວ່າແລະເຮັດໃຫ້ນ້ອງຮູ້ ໃນສິ່ງທີ່ ບໍ່ເຄີຍຮູ້ ມາກ່ອນໃຊ້ເວລາຫວ່າງເປັນປະໂຫຍດໄດ້ຊ່ວຍ ໃຫ້ຜູ້ຟັງໄດ້ຮັບຮູ້ບັນຫາຕ່າງໆທີ່ຈະເກີດຂຶ້ນ. 
ຊື່ ແລະ ນາມສະກຸນ ນ. ວຽງຖະໝອມຈິດ ພູທອນສີ. ທີ່ເກີດ: ບ້ານສີມຸງຄຸນ, ທີ່ຢູ່ປັດຈຸບັນ: ບ້ານສີເມືອງ,ປະຈຸບັນຮຽນຫນັງສືຢູ່ໂຮງຮຽນ ມັດທະຍົມສຶກສາສົມບູນໄຊຍະບູລີ. ເວລາຫວ່າງ: ຟັງວິທະຍຸ ອ່ານປຶ້ມ. 
ນ້ອງເອງເປັນນັກຈັດລາຍການເລີ່ມແຕ່ປີ 2007 ການດຳເນີນກິດຈະກຳ ໃນໄລຍະທີໜຶ່ງ ພວກເຮົາ ໄດ້ຈັດ ລາຍການແບບເປັນກຸ່ມ ແລະໄລຍະນີ້ ພວກເຮົາກໍໄດ້ພົບກັບບັນຫາ ຫຍຸ້ງຍາກເລັກນ້ອຍ ເຊັ່ນວ່າ: ການຈັດ ແບ່ງງານຍັງມີການຂັດຄ້ອງ ເພາະພວກເຮົາຍັງບໍ່ຮູ້ໜ້າທີ່ຮັບຜິດຊອບ ຢ່າງທີຖວນ ແລະພວກເຮົາກໍໄດ້ມີການພັດ ທະນາ, ການປັບປຸງໃນ ແຕ່ລະໄລຍະຈົນມາຮອດປະຈຸບັນ ໄດ້ມີຄວາມ ສະດວກສະບາຍຫຼາຍຂຶ້ນ.. 
ຊື່ ແລະ ນາມສະກຸນ ນ. ອໍລະຢາ ບຸນຄົງ.ທີ່ເກີດ: ບ້ານໂພນສະອາດ, ທີ່ຢູ່ປັດຈຸບັນ: ບ້ານດອນເງິນ.ປະຈຸບັນຮຽນຫນັງສືຢູ່​​ໂຮງຮຽນ ມັດທະຍົມສຶກສາສົມບູນໄຊຍະບູລີ.ເວລາຫວ່າງ: ອ່ານປື້ມ, ຟ້ອນ.ນ້ອງເອງ ເປັນນັກ ຈັດລາຍການເລີ່ມແຕ່ ປີ 2007 ສຳລັບນ້ອງເອງໄດ້ມີຄວາມພາກພູມໃຈ ທີ່ສຸດ ທີ່ໄດ້ເຂົ້າ ຮ່ວມໃນໂຄງການນີ້ ເພາະເຮັດໃຫ້ເຮົໄດ້ຮູ້ຈັກການຈັດ ລາຍການ ແລ ະຍັງ ເຮັດໃຫ້ເຮົາມີ ຄວາມກ້າສະແດງ ອອກ, ມີການ ແກ້ໄຂວຽກງານຕ່າງໆ ມີສະຕິໃນການເຮັດວຽກອີກດ້ວຍ ນ້ອງເອງ ຢາກບອກວ່າມີຄວາມຮູ້ສຶກດີໃຈທີ່ສຸດ     ແລະປຶ້ມໃຈຫລາຍທີ່ໄດ້ເຂົ້າຮ່ວມ ເພາະປັນຄັ້ງທຳອິດສຳລັບນ້ອງ ນ້ອງກໍຕ້ອງຂໍຂອບໃຈນຳໂຄງການນີ້ ທີ່ເຮັດໃຫ້ນ້ອງໄດ້ມິຄວາມຮູ້ ຄວາມສາມາດເພີ່ມຂຶ້ນຈາກແຕ່ກ່ອນ ແລະຈາກສິ່ງທີ່ບໍ່ຮູ້ກໍຮູ້ເຊັ່ນ: ເວລາທີ່ລົງເຄື່ອນໄຫວຊຸມຊົນ.
 ສະເພາະລາຍການເປີດໃຈໄວຫນຸ່ມ ທີ່ວິທະຍຸກະຈາຍສຽງແຂວງ ໄຊຍະບູລີ ກວ່າຈະມີລາຍການ ອອກອາກາດໄດ້ມາ ກໍບໍ່ແມ່ນເລື່ອງງ່າຍເຊັ່ນດຽວກັນເຊິ່ງຜູ້ຮັບຜິດຊອບ ລາຍການຂອງແຂວງແລະ ສູນກາງ ກໍຄື ວິທະຍຸກະຈາຍສຽງແຫ່ງຊາດໄດ້ມີການປະສານງານ ກັບໂຄງການເຊິ່ງພວກເຮົາຕ້ອງໄດ້ເຮັດວຽກຫລາຍໃນເວລາອັນສັ້ນໆເຊັ່ນ: ການວາງແຜນຝຶກອົບຮົມໃຫ້ເດັກ, ການຊອກຫາບຸກຄະລາກອນໂດຍສະເພາະແມ່ນນັກຈັດລາຍການຫນຸ່ມ ທີ່ຈະມາຈັດລາຍການວິທະຍຸເຊິ່ງນັກຈັດລາຍການເຫລົ່ານັ້ນ ຕ້ອງເປັນຜູ້ທີ່ຍອມຮັບຈາກຜູ້ຟັງໃນກຸ່ມໄວຫນຸ່ມແລະອັນສຳຄັນ ນັກຈັດລາຍການ ທີ່ວ່ານີ້ ຕ້ອງເຮັດວຽກດ້ວຍໃຈ . ເຖິງຢ່າງໃດກໍດີ ​  ໂຄງການນີ້ແມ່ນໄດ້ຮັບຄວາມສົນໃຈ ຈາກນັກຈັດລາຍການຫນຸ່ມຫລາຍຄົນແລະປະຈຸບັນ ລາຍການເປີດໃຈໄວຫນຸ່ມ ວິທະຍຸແຂວງໄຊຍະບູລີພວກເຮົາ ກໍໄດ້ມີໄວຫນຸ່ມມາສະຫນັກເປັນນັກຈັດລາຍການ ເຖິງ10​ ກວ່າຄົນເຊິ່ງສາມາດແຕ່ງເປັນທີມງານຜະລິດລາຍການໄດ້ 2​ ທີ
     ສຳລັບລາຍການທຳອິດ ທີ່ໄດ້ທຳການອອກອາກາດກະຈາຍຜ່ານຄື້ນວິທະຍຸ FM 95,3 MHzແຂວງໄຊຍະບູລີແມ່ນເວລາ 17:00-17:30 ຂອງວັນພະຫັດ ທີ 06 ພະຈິກ 2009 ຄືລາຍການເປີດໃຈໄວຫນຸ່ມໃນຫົວຂໍ້ ມີຮັກໃນໄວຮຽນເຫນືອແສງທຽນໃກ້ຈະດັບ”  ທີ່ເວົ້າເຖິງຜົນສະທ້ອນ ຂອງການມີຄວາມຮັກ ຢູ່ໃນໄວຮຽນ ຂອງໄວຫນຸ່ມເຊິ່ງໃນຫົວຂໍ້ນີ້ ຈະປະກອບດ້ວຍ ສາລະຫນ້າຮູ້, ສະປອດ, ຂ່າວ, ການສຳພາດ. ສຽງມວນຊົນ, ຄຳຂັວນ, ລະຄອນ, ກາບກອນ,ນິທານແລະສຽງເພັງ
ນັບແຕ່ວັນນັ້ນເປັນຕົ້ນມາ ການອອກອາກາດຂອງລາຍການເປີດໃຈໄວຫນຸ່ມນີ້ ກໍເຫັນໄດ້ວ່າໄດ້ຮັບການຕອບຮັບຈາກຜູ້ຟັງເປັນຢ່າງດີເປັນຕົ້ນແມ່ນເດັກ-​ໄວຫນຸ່ມ ລວມໄປເຖິງຜູ້ໃຫຍ່ກໍໃຫ້ຄວາມສົນໃຈ ຍ້ອນວ່າລາຍການທີ່ຜະລິດນີ້ ມີຮູບແບບໃຫມ່ ມີຫລາຍປະເພດບົດ​, ປະກອບຢູ່ນຳກັນແຕ່ກໍຫນ້າເສຍດາຍ ທີ່ລາຍການອອກອາກາດນັ້ນເປັນລາຍການບັນທຶກເຮັດໃຫ້ຜູ້ຟັງບໍ່ສາມາດສົນທະນາກັບນັກຈັດລາຍການ​​ໄດ້ໂດຍກົງ ດ້ວຍເຫດນີ້ ມັນຈິ່ງໄດ້ເປັນບັນຫາໃຫ້ທີມງານພວກເຮົາຕ້ອງໄດ້ຄິດວ່າ ຖ້າຫາກສາມາດ ຈັດລາຍການສົດອອກອາກາດໄດ້ ມັນກໍຈະກາຍເປັນການສົ່ງເສີມໃຫ້ກັບຜູ້ຟັງມີສ່ວນຮ່ວມຫລາຍຂຶ້ນແລະເຮັດໃຫ້ນັກຈັດລາຍການໄດ້ນຳໃຊ້ທັກສະຕ່າງໆໃນການຊ່ວຍເຫລືອເພື່ອນໄວຫນຸ່ມ ທີ່ເປັນກຸ່ມຜູ້ຟັງ ຜ່ານທາງວິທະຍຸໄດ້ຫລາຍຂຶ້ນ...
ປີ 2008 ​ໂຄງການວິທະຍຸເດັກ​​ໄວຫນຸ່ມໄດ້ເຫັນສະພາບບັນຫາກ່ຽວກັບການເວົ້າໃນທີ່ຊຸມຊົນແລະເວົ້າໃນເວທີການສະແດງເຊິ່ງນັກຈັດລາຍການຍັງຂາດເຕັກນິກບາງສ່ວນ ແລະທັກສະໃນການເວົ້າ ດ້ວຍເຫດນີ້ໂຄງການຈິ່ງໄດ້ຈັດການອົບຮົມກ່ຽວກັບການເວົ້າເທິງເວທີແລະການຈັດລາຍການສົດ ອັນຈະເປັນການສົ່ງເສີມ ຄວາມສາມາດ​  ໃຫ້ກັບນັກຈັດລາຍການເປີດໃຈໄວຫນຸ່ມ  ຂອງແຂວງໄຊຍະບູລີ​  ເຊິ່ງນັກຈັດລາຍການຂອງພວກເຮົາ ກໍໄດ້ເຂົ້າຮ່ວມຝຶກອົບຮົມ ໃນແຕ່ລະຄັ້ງ​ ​ແລະໄປທັດສະນະສຶກສາ  ທີ່ປະເທດກຳປູເຈຍ​ ​ເພື່ອຖອດຖອນບົດຮຽນກັບເພື່ອນຕ່າງປະເທດໂດຍໄດ້ຮັບການສະຫນັບສະຫນູນຈາກອົງການຢູນິເຊັບ. ການໄປນັ້ນແມ່ນເພື່ອແລກປ່ຽນບົດຮຽນ, ປະສົບການກັບຜູ້ທີ່ໄດ້ເຮັດວຽກກ່ຽວກັບເດັກແລະບັນຫາຕ່າງໆທີ່ສ່ວນໃຫຍ່ມັກເກີດກັບໄວຫນຸ່ມ ທັງນີ້ກໍເພື່ອເຮັດໃຫ້ການເຮັດວຽກຂອງທີມງານ ວິທະຍຸເດັກ-​ໄວຫນຸ່ມແຂວງໄຊຍະບູລີມີຄວາມຄ່ອງຕົວ ໂດຍສະເພາະແມ່ນການຜະລິດລາຍການຮູບແບບໃຫມ່ພ້ອມກັບການຈັດຕັ້ງກຸ່ມຜູ້ຟັງໃຫ້ມີປະສິດທິພາບ.
 ປັດຈຸບັນ ທີມງານວິທະຍຸໄວໜຸ່ມແຂວງໄຊຍະບູລີຍັງສືບຕໍ່ຜລິດລາຍການ ແລະ ການເຄື່ອນໄຫວອື່ນໆເພື່ອຮັບໃຊ້ສັງຄົມ ແລະ ດຽວນີ້ ລາຍການເປີດໃຈໄວໜຸ່ມ ແຂວງໄຊຍະບູລີ ຍັງໄດ້ຈັດເປັນພາສາມົ້ງຕື່ມອີກ.
ບໍ່ວ່າໃກ້ຫລືໄກ ສຽງພວກເຮົາສົດໃສ.....ແລະ ພ້ອມທີ່ຈະໄປເຖິງທ່ານ ໃນໄວໆນີ້...
...ຂໍຂອບໃຈນຳອົງການ Unicef, ວິທະຍຸກະຈາຍສຽງແຫ່ງຊາດລາວ ແລະ ສູນວັດທະນະທຳເດັກ-ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ຊ່ວຍເຫລືອພວກເຮົາທາງດ້ານງົບປະມານ ແລະ ວິຊາການ.....
ຂອບໃຈທຸກໆທ່ານ ທີ່ໃຫ້ໂອກາດ ແລະ ສະໜັບສະໜູນການເຄື່ອນໄຫວກິດຈະກຳຕ່າງໆ
ພວກເຮົາດີໃຈ ແລະ ພ້ອມແລ້ວທີ່ຈະສືບຕໍ່ກິດຈະກຳນີ້ຕໍ່ໄປ....
....ຂອບໃຈຫລາຍໆ....

No comments:

Post a Comment