Tuesday, July 12, 2011

ທີມງານວິທະຍຸໄວໜຸ່ມແຂວງຈຳປາສັກ

ໂຄງການ​ວິທະຍຸ​ເດັກ-​ໄວໜຸ່ມ ​ແຂວງ​ຈຳ​ປາ​ສັກ​ໄດ້​ເລີ່​ມມາ​ແຕ່​ປີ 2005​ໂດຍ​ມີ​ຫົວ​ຂໍ້​ວ່າ: ຄິດ​ໃຫ້​ດີ​ຊີວິດ​ຈະ​ປອດ​ໄພ. ​ເນື້ອ​ໃນ​ຂອງ​ລາຍ​ການ​ໄດ້​ເນັ້ນ​ໃສ​ບັນ​ຫາ​ການ​ຄ້າ​ມະນຸດ​ແລະ ພະຍາດ​ເອດ. ມາ​ຮອດ​ປີ2007 ຈຶ່ງ​ໄດ້​ປ່ຽນຫົວ​ຂໍ້​ໃໝ່ມີ​ຊື່ວ່າ: ພໍ່​ຮັກ​ລູກ​ຜູກ​ພັນ​ຄອບຄົວ.​ເນື້ອ​ໃນ​ຂອງ​ລາຍການ​ກໍ່​ເນັ້ນ​ບັນຫາ​ເກົ່າ. ​ເຊີ່ງ​ອອກ​ອາ​ອກາດ​ທາງ​ວິທະຍຸ​ກະຈາຍສຽງ​ແຂວງ​ຈຳ​ປາ​ສັກ​ໃນ​ລະບົບ FM 103,7 MKZ ທຸກໆວັນ​ອາທິດ​ເວລາ 11: 00 -11: 30 ມ.

ອີງ​ໃສ່​ກອງ​ປະຊຸມ​ທົບ​ທວນ​ວຽກງານ​ໂຄງການ​ທີ່​ໄດ້​ຈັດ​ຂື້ນ ​ໃນ​ວັນ​ທີ 18-19 ພຶດສະພາ ປີ 2009 ທີ່​ທ່າ​ລາດ​ແຂວງ​ວຽງຈັນ. ນັບ​ແຕ່​ນັ້ນມາ​ຈຶ່ງ​ຜະລິດ​ລາຍການ​ໃນ​ຫົວ​ຂໍ້ ​ເປີດ​ໃຈ​ໄວໜຸ່ມ. ​ເປັນ​ເອກະ​ພາ​ບກັນ​ໃນ​ທົ່ວ​ປະ​ເທດ ​ໂດຍ​ໄດ້​ເນັ້ນ​ໃສ່​ໂຄສະນາ​ກ່ຽວກັບ ສິດທິ​ເດັກ, ພະຍາດ​ເອດ, ສຸຂະພາບ, ຢາ​ເສບ​ຕິດ, ການ​ຄ້າ​ມະນຸດ ​ແລະ ປັນຫາ​ອື່ນໆທີ່​ມີ​ຜົນ​ດີ​ຕໍ່​ເດັກ-​ໄວໜຸ່ມ

 ລາຍ​ການ​ນີ້ມີ​ປະສິດທິ​ຜົນ ​ແລະ ​ໄດ້​ຮັບ​ຄວາມ​ນິຍົມ​ຊົມ​ຊອບ​ຈາກ​ຜູ້​ຟັງ​ຢ່າງ​ກ້ວາງຂວາງ ບໍ່​ວ່າ​ກຸ່ມ​ຜູ້​ຟັງ​ທີ່​ເປັນ​ຜູ້​ໃຫຍ່​ກໍ​ຄຶ​ກຸ່ມ​ເດັກ-​ໄວໜຸ່ມ. ສີ່​ງທີ່​ພາກພູມ​ໃຈ​ເປັນ​ຍາງ​ຍີ່​ງ​ແມ່ນ​ທີ​ມງານ​ຂອງພວກ​ເຮົາ​ໄດ້​ເລືອກ​ເຟັ້ນ​ເອົາ​ນັກ​ຈັດ​ລາຍການ​ວິທະຍຸ​ເດັກ-​ໄວໜຸ່ມ ທີ່​ມາ​ຈາກ​ສູນວັດທະນະທຳ​ເດັກ​ຂອງ​ແຂວງ​ໂດຍ​ໄດ້​ຂັດ​ເລືອ​ກ​ເອົາ​ຜູ້​ທີ່​ມີ​ຄວາມ​ສະ​ຫງວນມັກ, ມີ​ພອນ​ສະ​ແຫວ​ງມາ​ດຳ​ເນີນ​ລາຍການ​ໂດຍ​​ເນັ້ນ​ໃສ່​ຮູບ​ແບບ​ລາຍການ​ວາລະສານ​ວິທະຍຸ​ໃນ​ຮູບ​ແບບ​ໃໝ່​ໂດຍ​​ເລັ່ງ​ໃສ່ການ​ນຳ​ໃຊ້​ທັກ​ສະ​ຊີວິດ​ເຂົ້າ​ໄປ​ໃນ​ລາຍ​ການ​.
 ການ​ທີ່​ທີ​ມງານ​ຂອງ​ພວກ​ເຮົາ​ໄດ້​ເລືອກ​ເອົາ​ວິ​ທີ່​ການ​ນຳ​ໃຊ້​ຮູບ​ແບບ​ທັກ​ສະ​ຊີວິດ​ເຂົ້າ​ໃນ​ລາຍການ​ວິທະຍຸ​ນັ້ນກໍ່​ມີ​ຢູ່​ສາມ​ເຫດຜົນ​ຄື: ມັນ​ເປັນ​ຈຸດ​ສ້າງ​ສີສັນ​ໃຫ້​ແກ່​ຜູ້​ຟັງ,ມັນ​ຊ່ວຍ​ສ້າງ​ທັກ​ສະ​ຕ່າງໆ​ໃຫ້​ແກ່​ຄົນ​ຟັງ​ໂດຍ​ສະ​ເພາະ​ແມ່ນ​ໄວໜຸ່ມ​ເພື່ອ​ເຂົ້າຕັດ​ສິນ​ບັນຫາ​ໃຫ້​ຖືກຕ້ອງ​ໃນ​ລະດັບໜຶ່ງ ພ້ອມນີ້ມັນຍັງ​ຊ່ວຍ​ໃຫ້​ຄົນ​ຟັງ​ມີ​ສ່ວນຮ່ວມ ​ແລະ ກ້າ​ສະ​ແດງ​ອອກ​ຄວາມ​ຄິດ​ຄວາມ​ເຫັນ​ຂອງ​ຕົນ​ເອງ,ຖ້າ​ເປັນ​ເຊັ່ນ​ນີ້​ການ​ແລກປ່ຽນປະສົບ​ການ​ໂດຍ​ອາ​​ໄສລາຍນີ້​ເປັນ​ສື່​ກໍ່​ຈະ​ນັບ​ມື້ນັບຫຼາຍ ​ແລະ ນັບ​ຫາ​ທີ່​ຍາກ​​ໃນ​ການ​ແກ້​ໄຂ​ຂອງ​ໄວໜຸ່ມກໍ່​ຈະ​ສະດວກ ​ແລະ ງ່າຍ​ຂຶ້ນ.
 ຜ່ານ​ການ​ໂຄສະນາ​ຜ່ານ​ສື່​ວິທະຍຸດ້ວຍ​ການ​ຜະລິດ​ລາຍການ, ຜະລິດ​ສະປ໋ອດ​ໃນ​ໄລຍະ​ຜ່ານ​ມາ​ເຫັນ​ວ່າ: ຜູ້​ໃຫຍ່​ ກໍ່​ຄຶ​ຜູ້​ປົກຄອງ​ມີ​ຄວາມເຂົ້າ​ໃຈ ​ແລະ ຍອມຮັບ​ຄວາມ​ຄິດ​ຄວາມ​ເຫັນ​ ຂອງ​ເດັກນ້ອຍ​ທີ່​ໄດ້​ສະ​ແດງ​ອອກນັບ​ມື້​ນັບຫຼາຍຂຶ້ນ.
     ຊື່ ແລະ ນາມສະກຸນ ທ້າວ ວຽງສະຫວັນ ພົນ​ລະ​ມະນີ ຫຼື ວຽງ. ທີ່​ເກີດ​ ບ້ານ​ໂຊກ​ອຳນວຍ, ທີ່ຢູ່ປັດຈຸບັນ ບ້ານ​​ໂຊກ​ອຳນວຍ,ປະຈຸ​ບັນ​ຮຽນຫນັງສືຢູ່​ໂຮງຮຽນ ມໍ​ຕົ້ນສາທິດ, ເວລາ​ຫວ່າງ: ຫຼີ້ນກິລາເຕະບານ, ຟັງວິທະຍຸ. 
    ເປັນ​ນັກ​ຈັດ​ລາຍການ​ມາ​ແຕ່​ປີ 2005  ການ​ດຳ​ເນີນ​ກິດຈະກຳ​ແຕ່ລະ​ໄລຍະ​ມີ​ຄວາມ​ສະດວກ,​ເປັນ​ກັນ​ເອງ​ເຮັດ​ວຽກ​ເປັນ​ທີ​ມງານ,ມີ​ການວາງ​ແຜນ​ໃນ​ແຕ່ລະ​ເດືອນ,ມີ​ການ​ແບ່ງ​ວຽກກັນ​ຢ່າງ​ລະອຽດ ​ແລະ ສະຫລັບ​ສັບ​ປ່ຽນກັນ​ອອກ​ລາຍການ​ສົດ,ການ​ຂຽນຂ່າວ,ການ​ຂຽນສະ​ກິບ,ຊວນ​ຫົວ ​ແມ່ນ​ມີ​ຄວາມ​ສຳຄັນ​ເພາະ​ເຮັດ​ໃຫ້​ຜູ້​ຟັງ​ໄດ້​ປະ​ທັບ​ໃຈ.ສ່ວນ​ອຸປະ​ສັກ​ແລະ​ຂໍ້​ຫຍຸ້ງຍາກ​ແມ່ນ​ມີ​ຫນ້ອຍ​ເພາະ​ໄດ້​ມີ​ການ​ປຶກສາ​ຫາລື​ກັບ​ຜູ້​ຮັບຜິດຊອບ​ລາຍການ​ໃນ​ໄລຍະ​ຜ່ານ​ມາ​ຕົນ​ເອງ​ໄດ້​ມີ​ການ​ເຝິກອົບຮົມ 5 ​ເທື່ອພາຍ​ໃນ​ປະ​ເທດ​ເຊັ່ນ: ການ​ຕັດ​ຕໍ່ສຽງ,ການ​ອອກ​ອາກາດ​ສົດ,ການ​ລົງ​ຊຸ​ມຊົນ,ການ​ເຝິກ​ກ່ຽວກັບ​ພະຍາດ​ສາຍ​ພັນ​ໃຫມ່,ກ່ຽວກັບ​ສິດທິ​ສະ​ເຫມີ​ພາບ ລະຫວ່າງ​ບັດ​ບາດ​ເດັກ​ຍິງ-​ເດັກ​ຊາຍ. 
    ຊື່ ແລະ ນາມສະກຸນ ທ້າວ ຈັນທະ​ວີ ບົວ​ພັນ​ນາ ຫຼື ຂຽດ, ທີ່ເກີດ ບ້ານ​ ສະຫນາມ​ໄຊ, ທີ່ຢູ່ປັດຈຸບັນບ້ານ ພັດທະນາ​ສະຫນາມ​ໄຊ, ປະຈຸ​ບັນ​ຮຽນຫນັງສືຢູ່​ໂຮງຮຽນມັດທະຍົມສຶກສາ​ສົມບູນ​ໂພນ​ໄຊ,ເວລາ​ຫວ່າງ:​ ອ່ານປື້ມ, ຟັງເພງ.
    ເປັນ​ນັກ​ຈັດ​ລາຍການ​ເລີ່​ມ​ແຕ່​ປີ 2007 ການ​ດຳ​ເນີນ​ການ​ແມ່ນ​ມີ​ຄວາມ​ສະດວກ​ສະບາຍ​ໄດ້​ເຄື່ອນ​ໄຫວ​ຢ່າງ​ຕໍ່​ເນື່ອງ​ເປັນ​ປົກກະຕິ ສິ່ງ​ທີ່​ປະ​ທັບ​ໃຈ​ແມ່ນ​ເຮັດ​ໃຫ້​ຕົນ​ເອງ​ມີ​ສ່ວນ​ຮ່ວມ​ໃນ​ການ​ເຮັດ​ວຽກ, ມີ​ຄວາມ​ຮູ້​ມີ​ຄວາມ​ສາມາດ,​ກ້າ​ສະ​ແດງ​ອອກ​ເຊັ່ນ​: ການ​ຂຽນ,ການ​ອ່ານດການ​ໃຊ້​ເວລາ​ຫວ່າງ​ໃຫ້​ເປັນ​ປະ​ໂຫຍ​ດ. ຜ່ານ​ມາ​ຕົນ​ເອງ​ໄດ້​ເຂົ້າຮ່ວມ​​ເຝິກອົບຮົມຢູ່​ພາຍ​ໃນ​ໃນ​ຫົວ​ຂໍ້ ພໍ່ຮັກ​ລູກ​ຜູກ​ພັນ​ຄອບຄົວ, ການ​ໂຄສະນາ​ຊຸມ​ຊົນ, ບົດບາດ​ຍິງ-ຊາຍ, ​ແລະ​ຢູ່​ທີ່​ແຂວງ ສະຫວັນ​ນນະ​ເຂດ​ໃນ​ຫົວ​ຂໍ້ ປັບປຸງ​ວຽກງານ​ການ​ເຄື່ອນ​ໄຫວ​ໃນ​ຊຸມ​ຊົນ. 

    ຊື່ ແລະ ນາມສະກຸນ ທ້າວ ອະນຸ​ສິນ ພິລາ​ວົງ ຫຼື ແກະ. ທີ່ເກີດ ບ້ານ​ຫ້ວຍ​ຍາງ​ຄຳ,ປະຈຸ​ບັນ​ຮຽນຫນັງສືຢູ່​ໂຮງຮຽນ ມັດທະຍົມ​ຕອນ​ຕົ້ນ ບ້ານ​ກາງ,​ເວລາ​ຫວ່າງ:​ ຟັງວິທະຍຸ, ຫຼີ້ນກິລາເຕະຕໍ້.   ນ້ອງ​ເອງ​ເປັນ​ນັກ​ຈັດ​ລາຍການມາ​ແຕ່​ກາງປີ2009 ການ​ດຳ​ເນີນ​ກິດຈະກຳ​ໃນ​ແຕ່ລະ​ໄລຍະ​ແມ່ນ​ດີ​ເພາະວ່າ​ລາຍການ​ອອກ​ອາກາດ​ວັນ​ອາທິດ​ເວລາ 11:00-11:30 ​ໂມງ, ບໍ່ຂັດຂ້ອງ​ໃນ​ວັນ​ຮຽນ. ສິ່ງ​ທີ​ປະ​ທັບ​ໃຈ​ຫລາຍ​ຄື​ທຸກ​ຄົນ​ມີ​ຄວາມ​ກະຕືລືລົ້ນ​ໃນ​ຫນ້າ​ທີ​ວຽກຂອງ​ໃຜລາວ​ ແລະບໍ່ມີ​ອຸປະສັກ​ຢ່າງ​ໃດ​ທີ​ຈະ​ເຮັດ​ໃຫ້ລາຍ ການ​ເປີດ​ໃຈ​ໄວ​ຫນູ່ມມີ​ຄວາມ​ທໍ້ຖອຍ.
    ຊື່ ແລະ ນາມສະກຸນ ທ້າວ ສີຍາ ວົງ​ພົມ  ຫຼື ໂກະ. ທີ່ເກີດ ບ້ານ​ຫວ້ຍຍາງ​ຄຳ​ໃຕ້, ປະຈຸ​ບັນ​ຮຽນຫນັງສືຢູ່​ໂຮງຮຽນມັດທະຍົມ​ຕອນ​ຕົ້ນ ບ້ານ ກາງ, ເວລາ​ຫວ່າງ:​ ຟັງເພງ, ອ່ານປື້ມ, ຫຼີ້ນກິລາເຕະບານ. 
    ເປັນ​ນັກ​ຈັດ​ລາຍການ​ແຕ່​ຕົ້ນປີ 2009 ການ​ດຳ​ເນີນ​ ກິດຈະກຳ​ແຕ່ລະ​ໄລຍະ​ ມີ​ຄວາມ​ສະດວກ​ດີ,ປະ​ທັບ​ໃຈ​ທີມງານ​ທີ​ມີ​ຄວາມ​ສາມັກຄີ,​ເຮັດ​ວຽກ​ເປັນ​ກຸ່ມ ​ແລະ ພູມ​ໃຈ​ທີ​ໄດ້​ເປັນ​ນັກ​ຈັດ​ລາຍການ ​ໄດ້​ສະ​ແດງ​ຄວາມ​ຮູ້​ຄວາມ​ສາມາດ​ຂອງ​ຕົນ​ໃຫ້​ສັງຄົມ​ກໍ່ຄື​ມວນ​ຊົນ​ໄດ້​ຮັບ​ຮູ້. ອຸປະສັກ​ ແມ່ນ​ມີ​ຫລາຍ​ສິ່ງ ​ຫລາຍ​ຢ່າງ​ເປັນຕົ້ນ​ແມ່ນ ​ເວລາ​ຍັງ​ບໍ່​ເອື້ອອຳນວຍ​ຄວາມ​ສະດວກ ​ເພາະວ່າ​ນ້ອງ​ຍັງ​ເປັນ​ນັກຮຽນ​ແລະ​ໃນ​ອະນາຄົດ​ນ້ອງ​ເອງ​ຢາກ​ໃຫ້​ໂຄງການ​ນີ້ຍືນ​ຍົງ ​ແລະ ​ໃຫ້​ມີ​ການ​ແລກປ່ຽນຄຳ​ຄິດ​ຄຳ​ເຫັນ. 
    ຊື່ ແລະ ນາມສະກຸນ ທ້າວ ສຸກ​ອຳ​ໄພ ພົນ​ລະ​ມະນີ ຫຼື ສຸດ. ທີ່ເກີດ ບ້ານ​​ໂຊກ​ອຳນວຍ, ທີ່ຢູ່ປັດຈຸບັນບ້ານ:  ​ບ້ານ ​ໂຊກ​ອຳນວຍ,ປະຈຸ​ບັນ​ຮຽນຫນັງສືຢູ່​ໂຮງຮຽນ​ ມັດທະຍົມ​ຕອນ​ຕົ້ນ ບ້ານ​ກາງ,  ເວລາ​ຫວ່າງ:​ ຟັງເພງ, ອ່ານປື້ມ, ເຮັດກິດຈະກຳ.
    ເປັນ​ນັກ​ຈັດ​ລາຍການ​ແຕ່​ປີ 2007 ການ​ດຳ​ເນີນ​ກິດຈະກຳ​ມີ​ຄວາມ​ຫຍຸ້ງຍາກ​ແດ່​ຫນ້ອຍ​ຫນຶ່ງ. ການ​ເຮັດ​ວຽກຂອງ​ພວກ​ເຮົາ​ແມ່ນ​ເຮັດ​ວຽກ​ເປັນ​ທີ​ມ, ມີ​ການວາງ​ແຜນ,ມີ​ການ​ປັບປຸງ​ເລື້ອຍໆ ​ໂດຍ​ສະ​ເພາະ​ແມ່ນ​ການ​ຂຽນສະ​ກິບ,ຊວນ​ຫົວ,ສາລະ​ຫນ້າ​ຮູ້. ​ໄລຍະ​ຜ່ານ​ມາ​ການຈັດ​ລາຍການ​ແມ່ນ​ບໍ່ມີ​ອຸປະສັກ ​ເພາະວ່າ​ການ​ເຮັດ​ວຽກຂອງ​ພວກ​ເຮົາ​ແມ່ນ​ໄດ້​ເຮັດ​ຕາມ​ແຜນການ​ທີ​ວາ​ງ​ໄວ້. ​ໃນ​ອະນາຄົດ​ແມ່ນ​ຢາກ​ໃຫ້​ສືບຕໍ່​ໂຄງການ​ວິທະຍຸ​ສຳລັບ​ເດັກ ​ເພາະ ມັນ​ມີ​ຜົນ​ດີ​ຫລາຍ​ຢ່າງ​ເຊັ່ນ : ການ​ມີ​ສ່ວນ​ຮ່ວມ, ທັກ​ສະ​ໃນ​ການ​ເວົ້າ ​ແລະ ອື່ນໆ. 
    ຊື່ ແລະ ນາມສະກຸນ ທ້າວ ສາຍ​ລົມ ​ໃຊປັນຍາ ຫຼື ລົມ, ທີ່ເກີດ ​ບ້ານ​ສີ​ບຸນ​ເຮືອງ, ທີ່ຢູ່ປັດຈຸບັນບ້ານ:  ​ບ້ານ ຫ້ວຍ​ຍາງ​ຄຳ​ໃຕ້, ປະຈຸ​ບັນ​ຮຽນຫນັງສືຢູ່​ໂຮງຮຽນມັດທະຍົມ​ຕອນ​ປາຍ ປາກ​ເຊ,  ເວລາ​ຫວ່າງ:​ ຟັງວິທະຍຸ, ອ່ານປື້ມ.
    ເປັນ​ນັກ​ຈັດ​ລາຍການເລີ່​ມ​ແຕ່​ປີ 2008 ການ​ດຳ​ເນີນ​ກິດຈະກຳ​ແຕ່ລະ​ໄລຍະ​ແມ່ນ​ມີ​ຄວາມ​ຫ້າວຫັນ ​ແລະ​ ມີ​ຄວາມ​ກະຕືລືລົ້ນ ສິ່ງ​ທີ​ປະ​ທັບ​ໃຈ​ຄື​ໃນ​ແຕ່​ລະອາ​ທິດ ພວ​ກ​ເຮົາ​ມີ​ການ​ລວມ ​ແລະ ວາງ​ແຜນ​ເພື່ອ​ມອບ​ຫນ້າ​ທີ​ໃຫ້​ແຕ່​ລະບຸກຄົນ. ມີ​ອຸປະສັກ​ຄື : ການ​ເຮັດ​ລາຍ​ການ​ມີ​ຄວາມ​ຫຍຸ້ງຍາກ​ຫລາຍ ​ເພາະວ່າ​ຍັງ​ຮຽນຢູ່. ​ໃນ​ອະນາຄົດ​ຄິດ​ຢາກ​ໃຫ້​ມີ​ການ​ເຝິກອົບ​ຮົມ​ໃຫ້​ແກ່​ນັກ​ຈັດ​ລາຍການ​ຮຸ່ນ​ສືບ​ທອດ. ຜ່ານ​ມານ້ອງ​ເອງ​ເຄີຍ​ເຂົ້າຮ່ວມ​ເຝິກ​ອົບຮົມ 1 ຄັ້ງ ​ໃນ​ຫົວ​ຂໍ້ ​ແນວ​ຄິດ​ພື້ນຖານ​ກ່ຽວກັບ​ບົດບາດ​ຍິງ​-ຊາຍ ​. 
    ຊື່ ແລະ ນາມສະກຸນ ທ້າ​ວ ວິລະ​ໄຊ ຄຳ​ສຸກ​ໃສ ຫຼື ສັ້ນ. ທີ່ເກີດ ບ້ານ ພູ​ມ່ວງ  , ທີ່ຢູ່ປັດຈຸບັນບ້ານ:  ​ບ້ານ ພູ​ມ່ວງ, ປະຈຸ​ບັນ​ຮຽນຫນັງສືຢູ່​ໂຮງຮຽນມັດທະຍົມ ຕອນ​ຕົ້ນ ບ້ານ​ກາງ​, ​ເວລາ​ຫວ່າງ:​ ຫຼີ້ນກິລາເຕະບານ, ເຮັດເກິດຈະກຳ. 
    ເປັນ​ນັກ​ຈັດ​ລາຍການ​​ເລີ່​ມ​ແຕ່ກາງ​ປີ 2007 ການ​ດຳ​ເນີນ​ການ​ໃນ​ແຕ່ລະ​ໄລຍະ​ທຸກ​ຄົນ​ແມ່ນ​ໃຫ້​ຄວາມ​ຮ່ວມ​ມື ​ແລະ ​ເຮັດ​ວຽກ​ເປັນ​ທີ​ມ ທຸກ​ຄົນ​ມີ​ຄວາມ​ຫ້າວຫັນ​ດີ. ສິ່ງ​ທີ​ປະ​ທັບ​ໃຈ​ແມ່ນ​ພາຍ​ໃນ​ທີ​ມງານ​ຂອງ​ພວກ​ເຮົາ​ແມ່ນ​ມີ​ຄວາມ​ສາມັກຄີ, ຊ່ວຍ​ເຫລືອ​ເຊິ່ງກັນ ​ແລະ ກັນ. ອຸປະສັກ​ໃນ​ການ​ການຈັດ​ສັນ​ເວລາ​ພາຍ​ໃນ​ທີ​ມງານ​ແມ່ນ​ບໍ່ລົງ​ໂຕ​ກັນ​ເພາະ​ຕ່າງ​ຄົນ​ກໍ່ມີຫນ້າ​ທີ​ຮັບຜິດຊອບ​ໃນ​ການ​ຮ່ຳຮຽນຂອງ​ຕົນ. ຜ່ານ​ມາ​ຕົນ​ເອງ​ໄດ້​ເຂົ້າຮ່ວມ​ເຝິກອົບຮົມ 2 ຄັ້ງ ​ໃນ​ຫົວ​ຂໍ້ ພໍ່ຮັກ​ລູກ​ຜູກ​ພັນ​ຄອບຄົວທີ່ ​ແຂວງ ຈຳປາ​ສັກ ​ແລະ ​ຫົວ​ຂໍ້ ການ​ຜະລິດ​ລາຍການ​​ເດັກ-ໄວ​ຫນຸ່ມ ຢູ່​ທີ່ ​ແຂວງ ວຽງຈັນ. 


    ຊື່ ແລະ ນາມສະກຸນ ທ້າວ ​ໄຊ​ປະສົງ ຈຽມສີ​ສຸລາ​ດ ຫຼື ໂກ. ທີ່ເກີດ ບ້ານ​ໂນນ​ສະຫວ່າງ, ທີ່ຢູ່ປັດຈຸບັນບ້ານ:  ​ບ້ານ ​ໂນນ​ສະຫວ່າງ, ປະຈຸ​ບັນ​ຮຽນຫນັງສືຢູ່​ໂຮງຮຽນ ມັດ​ທະ​ຍົມ​ສຶກສາ​ສົມບູນ ​​ໂພນ​ໄຊ, ເວລາ​ຫວ່າງ:​ ເບີ່ງບົດຮຽນ, ຟັງເພງ, ຟັງວິທະຍຸ, ຫຼີ້ນກິລາເຕະບານ.
    ເປັນ​ນັກ​ຈັດ​ລາຍການ​ມາ​ແຕ່​ປີ  2009 ​ເດືອນ​ກໍລະກົດ ການ​ດຳ​ເນີນ​ກິດຈະກຳ​ແຕ່ລະ​ໄລຍະ​ແມ່ນ​ມີ​ຄວາມ​ສະ​ດວກ​ດີ​ຕາມ​ທີ່​ທີ​ມງານ​ໄດ້​ວ່າງ​ແຜນ, ​ເຖີ່​ງ​ແມ່ນ​ວ່າ ​ຈະ​ມີ​ອຸປະສັກ​ເລັກ​ນ້ອຍ​ກໍ່ຕາມ​ເປັນຕົ້ນ​ແມ່ນ: ດີ​ນ ,ຟ້າ​,ອາກາດບໍ່​ເອື້ອອຳນວຍ​ໃນ​ການ​ລົງ​ບໍລິການ​ຊຸ​ຊົນ ນ້ອງ​ເອງ​ໄດ້​ມີ​ໂອກາດ​ຝຶກ​ອົຮົບຫຼາຍຄັ້ງ​ເປັນຕົ້ນກໍ່​ແມ່ນ​ການ​ເຝິກອົບຮົມ​ການຈັດ​ລາຍການ​ສຳລັບ​ເດັກ. ຜ່ານ​ການ​ເຝິກອົບຮົມ​ນ້ອງ​ກໍ່​ໄດ້​ບົດຮຽນຫລາຍ​ຢ່າງ​ເຊັ່ນ : ການ​ນຳ​ໃຊ້​ເຕັກນິກ​,ທັກ​ສະການ​ເວົ້າ, ພື້ນຖານ​ການ​ນຳ​ໃຊ້ອຸປະກອນ​ເຊັ່ນ: ການ​ສຳພາດ( ການ​ນຳ​ໃຊ້​ເທັບ​ສຽງ ), ນອກ​ນັ້ນຍັງ​ໄດ້​ຮູ້​ການ​ແກ້​ໄຂ​ບັນຫາ. ຢາກ​ໃຫ້​ມີ​ຫານ​ເຝິກອົບຮົມ​ໃນ​ການ​ພັດທະນາ​ເພື່ອ​ເຮັດ​ໃຫ້​ໂຄງການ​ມີ​ຄວາມ​ຍືນ​ຍົງ. 
    ຊື່ ແລະ ນາມສະກຸນ ນາງ ທິດາ​ວອນ ສະຫລັກ​ແສງ ຫຼື ກີ້. ທີ່ຢູ່ປັດຈຸບັນບ້ານ:  ​ບ້ານ ປາກ​ເຊ, ປະຈຸ​ບັນ​ຮຽນຫນັງສືຢູ່​ໂຮງຮຽນມັດທະຍົມ ​ໂພນ​ໄຊ. ​ເວລາ​ຫວ່າງ:​ ອ່ານປື້ມ, ຫຼີ້ນກິລາຕີ້ດອກ. 
    ເປັນ​ນັກ​ຈັດ​ລາຍການ​ເລີ່​ມ​ແຕ່​ປີ 2007 ​ແຕ່ລະ​ໄລຍະ​ກໍ່​ໄດ້​ມີ​ການ​ລົງ​ຊຸມ​ຊົນ​ເພື່ອ​ເຜີຍ​ແຜ່​ຄວາມ​ຮູ້​ ໃຫ້​ແກ່​ພໍ່ ແມ່​ປະຊາຊົນ. ສິ່ງ​ທີ​ປະ​ທັບ​ໃຈ​ແມ່ນ ການ​ເຮັດ​ວຽກ​ເປັນ​ທີ​ມ ​ແລະ ການ​ໃຫ້​ການຕ້ອນຮັບ​ຂອງ​ຊຸມ​ຊົນ​ທີ​ໄດ້​ລົງ​ໄປ​ເຄື່ອນ​ໄຫວ. ສຳລັບ​ອຸປະສັກ​ແມ່ນ​ມີ​ຫລາຍ​ພໍ​ສົມຄວນ​ແຕ່​ເຖິງ​ມີ​ຄວາມ​ຫຍຸ້ງຍາກ​ແນວ​ໃດ​ກໍ່ຕາມພວກ ​ເຮົາ​ກໍ່ຈະພະຍາຍາມ​ສູ້​ຊົນ ​ແລະ ຜ່ານ​ພົ້ນ​ໄປ​ໃຫ້​ໄດ້. 
     ຊື່ ແລະ ນາມສະກຸນ ນາງ ​ແສງ​ໄພລິນ ​ໂພນ​ສະຫວັນ ຫຼື ລິນ. ທີ່ເກີດ ບ້ານ​ ​ໂພນ​ບົກ, ທີ່ຢູ່ປັດຈຸບັນບ້ານ:  ​ບ້ານ ​ໂພນ​ບົກ,ປະຈຸ​ບັນ​ຮຽນຫນັງສືຢູ່​ໂຮງຮຽນມັດທະຍົມ ​​ໂພນ​ໄຊ, ​ເວລາ​ຫວ່າງ:​ ຟ້ອນ, ຟັງວິທະຍຸ
    ເປັນ​ນັກ​ຈັດ​ລາຍການ​ເລີ່​ມ​ແຕ່​ປີ 2007 ການ​ດຳ​ເນີນ​ລາຍການ​ໃນ​ແຕ່ລະ​ໄລຍະ​ແມ່ນ​ຈະ​ສ້າງ​ໃຫ້​ມີ​ຄວາມ​ຮູ້,ຄວາມ​ສາມາດ​ເພີ່ມ​ຂຶ້ນ. ສິ່ງ​ທີ​ມີ​ຄວາມ​ປະ​ທັບ​ໃຈ​ທີ​ສຸດ​ແມ່ນ​ການ​ລົງ​ຊຸມ​ຊົນ,ການ​ເຜີຍ​ແຜ່​ຄວາມ​ຮູ້​ໃຫ້​ແກ່​ທຸກ​ຄົນ​ໄດ້​ຮັບ​ຮູ້ ​ແລະ ທີ​ສຳຄັນ​ແມ່ນ​ການ​ສາມັກຄີ​ໃນ​ກຸ່ມ. ​ໃນ​ອະນາຄົດ​ແມ່ນ​ຢາກ​ໃຫ້​ລາຍການ​ມີ​ການ​ພັດທະນາ ​ແລະ ມີການ​ຂະຫຍາຍຕົວ​​ເພື່ອ​ເຮັດ​ໃຫ້​ຜູ້​ຟັງ​ມີ​ການ​ຮັບ​ຟັງ​ລາຍການ​ຫລາຍ​ຂຶ້ນ. ຜ່ານ​ມາ​ຕົນ​ເອງ​ໄດ້​ມີ​ການ​ເຝິກອົບຮົມ 2 ຄັ້ງ ​ໃນ​ຫົວ​ຂໍ້ ການຈັດ​ລາຍ​ການ​ສົດ ​ແລະ ການຈັດ​ລາຍການ​ທີ​ດີ​ຄວນ​ເຮັດ​ແນວ​ໃດ.
    ຊື່ ແລະ ນາມສະກຸນ ນາງ ສຸພາ​ພອນ ​ໄຊ​ສົງຄາມ ຫຼື ສັ້ນ,ທີ່ເກີດ ບ້ານ​ ຫ້ວຍ​ຍາງ​ຄຳ​ເຫນືອ, ທີ່ຢູ່ປັດຈຸບັນບ້ານ:  ​ບ້ານ ຫ້ວຍ​ຍາງ​ຄຳ​ເຫນືອ,ປະຈຸ​ບັນ​ຮຽນຫນັງສືຢູ່​ໂຮງຮຽນ​​ແຮ​ກມານ​ໄມ​ເນີ ( SOS ) ​ເວລາ​ຫວ່າງ:​ ເຮັດກິດຈະກໍາ, ຟ້ອນ. 
    ເປັນ​ນັກ​ຈັດ​ລາຍການ​ເລີ່​ມ​ແຕ່​ປີ 2009 ການ​ດຳ​ເນີນ​ກິດຈະກຳ​ໃນ​ແຕ່ລະ​ໄລຍະ​ແມ່ນ​ໄດ້​ອ່ານ​ນິທານ,ຊວນ​ຫົວ,ສະ​ກິບ. ມີ​ຄວາມ​ປະ​ທັບ​ໃຈ​ໃນ​ການ​ເປັນ​ໂຄສົກ ​ເພາະ​ເຮັດ​ໃຫ້​ຕົນ​ເອງ​ມີ​ຄວາມ​ກ້າ​ສະ​ແດງອອກ. ອຸປະສັກ​ບາງ​ຄັ້ງກໍ່ຄາ​ຮຽນ.​ໃນ​ອະນາ​ຄົດ​ຢາກ​ໃຫ້​ລາຍ​ການ​ນີ້ສືບ​ຕໍ່​ໄປ​ເລື້ອຍ ​ແລະ ຢາ​ກ​ເຂົ້າຮ່ວ​ມ​ເຝິກອົບຮົມ. 
    ຂໍ​ເປີດ​ໃຈ​ກ່ຽວກັບ​ຄວາມ​ຮູ້ສຶກ​ຂອງ​ຕົນ​ເອງ​ໃນ​ການ​ມີ​ສ່ວນ​ຮ່ວມ​ເຂົ້າ​ໃນ​ໂຄງການ​ນີ້ ​ແມ່ນ​ມີ​ຄວາມ​ພູມ​ໃຈ​ຫລາຍ ​ເພາະ​ເຮັດ​ໃຫ້​ຕົນ​ເອງ​ມີ​ປະສົບ​ການ,ຮູ້ຈັກ​ຫມູ່ຄູ່​ຫລາຍ​ຄົນ,ມີ​ຄວາມ​ກ້າ​ສະ​ແດງ​ອອກ ​ແລະ ຮູ້ຈັກ​ສິ່ງ​ໃຫມ່ໆຫລາຍ​ຢ່າງ.
    ຊື່ ແລະ ນາມສະກຸນ ນາງ ຟາ​ມທິຫງ່າ ຫຼື ຫງ່າ.ທີ່ເກີດ ບ້ານ​ ສາງ​ນ້ຳມັນ, ທີ່ຢູ່ປັດຈຸບັນບ້ານ:  ​ບ້ານ ຮ່ອງ​ລະ​ຍອມ,ປະຈຸ​ບັນ​ຮຽນຫນັງສືຢູ່​ໂຮງຮຽນມັດທະຍົມສົມບູນ ​ໂພນ​ໄຊ. ​ເວລາ​ຫວ່າງ:​ເຮັດກິດຈະກຳ, ຟ້ອນ, ເຕັ້ນ. ເປັນນັກ​ຈັດ​ລາຍການ​ເລີ່​ມ​ແຕ່​ປີ 2009 ການ​ດຳ​ເນີນ​ແຕ່ລະ​ໄລຍະ​ກໍ່​ໄດ້​ລົງ​ຊຸມ​ຊົນ​ໂຄສະນາ​ເຜີຍ​ແຜ່​ຄວາມ​ຮູ້​ເລື່ອງ​ຕ່າງໆ​ເຊັ່ນ: ພະຍາດ​ໂລກ​ເອດ,ພະຍາດ​ຖອກທ້ອງ,ອະນາ​ໄມ​ສາມ​ສະອາດ ​ແລະ ອື່ນໆ. ສິ່ງ​ທີ່​ປະ​ທັບ​ໃຈ​ແມ່ນ​ການ​ລົງ​ຊຸມ​ຊົນ ​ແລະ ​ໃຫ້​ຄວາ​ມຮູ້​ແກ່​ປະຊາຊົນ​ ​ໄດ້​ຮູ້​ເຖິງ​ການ​ຄ້າ​ມະນຸດ,ສິດທິ​ເດັກ ຫລື ການ​ໃຊ້​ຄວາມ​ຮຸນ​ແຮງ​ໃນ​ຄອບຄົວ ຕໍ່​ແມ່-​ເດັກ. ​ໃນ​ອະນາຄົດ​ຢາກ​ໃຫ້​ໂຄງການ​ນີ້ມີ​ການ​ເຜີຍ​ແຜ່​ຫລາຍ​ຂຶ້ນ​ເພື່ອ​ຈະ​ໄດ້​ມີ​ການ​ແລກປ່ຽນບົດ ຮຽນຫລາຍ​ຂຶ້ນ. ​ໃນ​ຜ່ານ​ມາ​ນ້ອງ​ເອງ​ເຄີຍ​ເຂົ້າຮ່ວມ​ເຝິກອົບຮົມ 1 ຄັ້ງ ຢູ່​ທີ່ ສະ​ໂມ​ສອນ​ຫລັກ 4 ​ແຂວງ ຈຳປາ​ສັກ ​ເຊິ່ງ​ເຮັດ​ນ້ອງ​ໄດ້​ສິດທິ​ຂອງ​ເດັກ,ບົດ​ບາດ​ຍິງ-ຊາຍ. 
    ຊື່ ແລະ ນາມສະກຸນ ນາງ ສຸພາ​ພອນ ສີ​ຫາ​ບຸດ ຫຼື ໂນໆ,ທີ່ເກີດ ບ້ານ​ ຫລັກ​ເມືອງ, ທີ່ຢູ່ປັດຈຸບັນບ້ານ:  ​ບ້ານ ພະ​ບາດ,ມັດທະຍົມສົມບູນ​ ​ໂພນ​ໄຊ, ​ເວລາ​ຫວ່າງ:​ ຟ້ອນ, ຟັງວິທະຍຸ.
    ເປັນ​ນັກ​ຈັດ​ລາຍການ​​ເລີ່​ມ​ແຕ່​ປີ 2009 ການ​ດຳ​ເນີນ​ງານ​ໃນ​ແຕ່ລະ​ໄລຍະ ​ໄດ້​ມີ​ການ​ເຝິກອົບຮົມ,ລົງ​ຊຸມ​ຊົນ,​ໂຄສະນາ​ເຜີຍ​ແຜ່. ສິ່ງ​ທີ່​ປະ​ທັບ​ໃຈ​ແມ່ນ ການ​ລົງ​ໄປ​ເຄື​ອ່ນ​ໄຫວ​ຊຸມ​ຊົນຢູ່​ເຂດ​ຊົນນະບົດ ​ແລະ ​ໃຫ້​ຄວາມ​ຮູ້​ແກ່​ພໍ່​ແມ່ ​ແລະ ​ເດັກ, ສິ່ງ​ສຳຄັນ​ແມ່ນ​ໄດ້​ເຂົ້າຮ່ວມ​ເຝິກອົບຮົມ​ກັບ​ຫລາຍ​ພາກສ່ວນ​ທີ່​ມາ​ຈາກ​ຕ່າງ​ແຂວງ ​ແລະ ​ມີ​ການ​ແລກປ່ຽນ​ເຊິ່ງກັນ ​ແລະ ກັນ. ​ໃນ​ອະນາຄົດ​ຢາກ​ໃຫ້​ມີ​ການຈັດ​ລາຍການ​ສົດ​ຫລາຍ​ກ່ວາ​ການ​ອັດ,ຢາກ​ໃຫ້​ເພິ່ມ​ເວລາ​ການຈັດ​ລາຍ​ການ. ຜ່ານ​ມາ​ຕົນ​ເອງ​ໄດ້​ເຂົ້າຮ່ວມ​ເຝິກອົບຮົມ​ຢູ່​ທີ່ ສະ​ໂມ​ສອນ​ຫລັກ 4 ​ແຂວງ ຈຳປາ​ສັກ ນອ້ງ​ເອງກໍ່​ໄດ້ຮຽນຮູ້​ຫລາຍ​ສິ່ງ​ຫລາຍ​ຢ່າງ,​ໄດ້​ຮູ້ຈັກ​ວິທີ​ການ​ຂຽນບົດ​ຢ່າງ​ຖືກຕ້ອງ ​ແລະ ການ​ອອກ​ລາຍ​ສົດ​ຄວນ​ປະຕິບັດ​ດຕົນ​ແນວ​ໃດ​ໃນ​ເວລາ​​ຫມູ່​ທີຢູ່​ທາງ​ຫນ້າ. 
    ຊື່ ແລະ ນາມສະກຸນ ນາງ ວໍລະສາ ຫຼ້າດວງເລີດ ຫຼື ຫລິນ. ທີ່ເກີດ ບ້ານ​ ຫາງດອນສະດຳ ເມືອງໂຂງ,  ທີ່ຢູ່ປັດຈຸບັນບ້ານ:  ​ບ້ານ ໂຊກອຳນວຍ ເມືອງປາເຊ ແຂວງຈຳປະສັກ.  ​ເວລາ​ຫວ່າງ:​ ຟ້ອນ, ອ່ານນິທານ.
    ນ້ອງເອງເປັນນັກຈັກລາຍການເລີ່ແຕ່ປີ 2010 ການດໍາເນີດງານ ແຕ່ລະໄລະຍະແມ່ນມີຄວາມສະ ດວກແລະຄວາມຫຍຸ້ງຫຍາກຫຼາຍຢ່າງ ໃນນັ້ນມີທັງການລົງຊຸມຊົນເຜີຍແຜ່ໂຄສະນາຕ່າງໆ. ແລະສີ່ງທີ່ປະທັບໃຈແມ່ນການໄດ້ເຮັດວຽກຮ່ວມກັບອ້າຍໆເອື້ອຍໆ ແມ່ນເພີ່ນມີຄວາມສາມັກຄີ ຮັກແພງຊ່ວຍເຫຼືອເຊິ່ງກັນແລະກັນ ບໍ່ຈະທຸກຫຼືສຸກ. ແລະໃນອານາຄົດນ້ອງຢາກໂຄງການນີ້ ສືບຕໍ່ໄປເລື້ອຍໆເພາະມັນໃຫ້ປະໂຫຍດແກ່ ພວກເຮົາພ້ອມທັງຜູ້ຟັງນຳອີກດ້ວຍເພາະໂຄງການ ນີ້ເຮັດໃຫ້ນ້ອງມີຄວາມສາມາດກ້າສະແດງອອກ, ໄດ້ເຮັດໃນສີ່ງທີ່ບໍ່ເຄີຍເຮັດມາກ່ອນ. 
     ລາຍການ​ເປີດ​ໃຈ​ໄວ​ຫນຸ່ມ ​ແຂວງ ຈຳປາ​ສັກ ກ່ອນ​ຈະ​ມີ​ລາຍການ​ອອກ​ອາກາດ​ມາ​ໄດ້​ນັ້ນມັນ​ບໍ່​ແມ່ນ​ເລື່ອງ​ງ່າຍດາຍ, ຜູ້​ຮັບຜິດຊອບ​ໂຄງການ​ພວກ​ເຮົາ​ຕ້ອງ​ໄດ້​ເຮັດ​ວຽກຫລາຍໆຢ່າງ​ໃນ​ເວລາ​ອັນ​ສັ້ນໆ​ເຊັ່ນ: ການວາງ​ແຜນ​ອອກ​ອາກາດ,ການ​ຂໍອະນຸຍາດ​ນຳ​ໃຊ້​ເວລາການ​ກະຈາຍສຽງ ຈາກ​ພະ​ແນ​ກຖະ​ແຫລງຂ່າວ-ວັດທະນະທຳ​ແຂວງ,ການ​ຊອກ​ຫາ​ບຸກຄະລາ​ກອນ ​ໂດຍ​ສະ​ເພາະ​ແມ່ນ​ນັກ​ຈັດ​ລາຍ​ຫນຸ່ມ ທີ​ຈະ​ມາ​ຈັດ​ລາຍການ ​ເຊິ່ງພວ​ກ​ເຮົາ​ໄດ້​ເລືອກ​ເຟັ້ນ ​ແລະ ຄັດ​ເລືອກ​ເອົາ​ໄວ​ຫນຸ່ມ​ທີ​ມີ​ຄວາມ​ສະຫງວນ​ມັກ, ມີ​ພອນ​ສະຫວັນ ​ແລະ ສະມັກ​ໃຈ​ຈາກ​ສູນວັດທະນະທຳ​​ເດັກຂອງ​ແຂວງ ນັບ​ແຕ່​ໂຄງການ​ນີ້​ເກີດ​ຂຶ້ນພວກ​ເຮົາ​ສາມາດ​ສ້າງ​ນັກ​ຈັດ​ລາຍການ​ໄດ້​ທັງ​ຫມົດ 10 ຄົນ, ຍິງ 06 ຄົນ.
    ​ໄປ​ພ້ອ​ມໆກັບ​ການ​ເຝິກອົບຮົມ​ທາງດ້ານ​ວິຊາ​ການ, ​ໃຫ້​ທຶນຮອນ​ແກ່​ທີ​ມງານ​ຂອງ​ພວກ​ເຮົາ​ແລ້ວ, ທາງ​ອົງການ​ຢູນິ​ເຊັບ ຍັງ​ໄດ້​ສະຫນອງ​ອຸປະກອນ​ໃນ​ການ​ຜະລິດ​ລາຍການ​ວິທະຍຸ​ໃຫ້​ແກ່​ພວກ​ເຮົາ​ຫລາຍ​ຢ່າງ ​ເພື່ອ​ແນ​ໃສ​ການ​ຜະລິດ​ລາຍການ​ຢ່າງ​ສະດວກ​ສະບາຍ ​ແລະ ​ເປັນ​ອິດສະຫລະ​ໃນ​ການ​ເຮັດ​ວຽກ​ເປັນ​ທີ​ມງານ. ​

    ລາຍການ​ ​ເປີດ​ໃຈ ​ໄວ​ຫນຸ່ມ ​ແຂວງ ຈຳປາ​ສັກ ​ແມ່ນ​ລາຍການ​ຫນຶ່ງ​ທີ​ພ້ອມ​ໄດ້​ຮັບ​ຄວາມ​ນິຍົມ​ຊົມ​ຊອບ​ຈາກ​ໄວ​ຫນຸ່ມ​ກໍ່ຄື​ຜູ້​ປົກຄອງ ​ເພາະ​ນອກຈາກ​ຈະ​ເຮັດ​ໃຫ້​ໄວ​ຫນຸ່ມ​ກ້າ​ສະ​ແດງ​ຄວາມ​ສາມາດ​ຂອງ​ຕົນ​ເອງ​ອອກ​ມາ​​ໃຫ້ເພື່ອນ​ໄວ​ຫນຸ່ມ​ໄດ້​ເຫັນ​ຜົນງານ​ແລ້ວ​ກໍ່ຍັງ​ເຮັດ​ໃຫ້​ຜູ້​ປົກຄອງ ​ແລະ ສັງຄົມ​ຮູ້​ໄດ້​ກ່ຽວກັບ​ຄວາມ​ຕ້ອງການ, ການ​ແກ້​ໄຂ​ບັນຫາ​ຕົນ​ເອງ​ໃນ​ລະດັບ​ຫນຶ່ງ​ໃນ​ການ​ດຳລົງ​ຊີວິດ​ຂອງ​ເຂົາ​ເຈົ້າ​ໃນ​ສະພາບ​ແວດ​ລ້ອມ​ເຂົາ​ປະ​ເຊີນ​ຢູ່​ອີກ​ດ້ວຍ.
     ຂອບໃຈທຸກໆທ່ານທີ່ເຂົ້າໃຈ, ໃຫ້ໂອກາດ ແລະ ຊ່ວຍເຫລືອທີມງານພວກເຮົາ
    ພົບພວກເຮົາໄດ້ທີ່: FM 103,7 MKZ ທຸກໆວັນ​ອາທິດ​ເວລາ 11: 00 -11: 30 ແຂວງຈຳປາສັກ.
     ຂອບໃຈອົງການ Unicef, ວິທະຍຸກະຈາຍສຽງແຫ່ງຊາດລາວ, ສູນວັດທະນະທຳເດັກ-ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ຊ່ວຍເຫລືອພວກເຮົາທັງງົບປະມານ ແລະ ວິຊາການດ້ວຍດີຕະຫລອດມາ....ຂອບໃຈຫລາຍໆເດີ້....

    No comments:

    Post a Comment